– ઈંગ્લેન્ડનાં સમ્રાટ જેમ્સે પોતાનો રાજભંડાર સમૃદ્ધ કરવા માટે એક નવી યુક્તિ અજમાવી. પ્રજા પાસેથી કર ઉઘરાવીને નાણાં એકત્ર કરવામાં લોકસમૂહનાં અસંતોષનો ભય સતાવે છે, પરંતુ સમ્રાટે ધનિકો હોંશે હોંશે ધન આપે એવો નુસખો કર્યો. એ કોઈને ‘ડ્યૂક’ની પદવી આપવા લાગ્યાં, તો કોઈને ‘લૉર્ડ’ બનાવવા લાગ્યાં. આ પદવી માટેની રકમ પણ નક્કી કરી. સમ્રાટ જેમ્સ જાણતાં હતાં કે પદવીથી કોઈ મહાન બનતું નથી. મહાન બનવા માટે તો ઉમદા સદ્ગુણો હોવા જોઈએ, પરંતુ એમને સૌ પદવીપિપાસુઓની તુચ્છ અહંકારવૃત્તિ પોષીને ધન એકત્ર કરવું હતું.
એક વાર એમની રાજસભામાં એક ધનવાન વ્યક્તિ આવી. સમ્રાટે પૂછ્યું, “કહો, તમને કઈ પદવી આપું ? ક્યો ઈલ્કાબ તમારે જોઈએ છે ?”
પેલી વ્યક્તિએ કહ્યું, “સમ્રાટ, તમે લૉર્ડ અને ડ્યૂક જેવી પદવી આપો છો, પણ મારે એવી પદવી જોઈતી નથી.”
સમ્રાટે કહ્યું, “અરે ! તમે કહોને ! જો યોગ્ય રકમ આપશો તો ‘લૉર્ડ’થી પણ કોઈ ચઢિયાતી કે ‘ડ્યૂક’થી પણ અતિ ગૌરવ ધરાવતી નવી પદવી આપીશ. “
પેલી વ્યક્તિએ કહ્યું, “સમ્રાટ, માફ કરજો. મારે કોઈ મહાન ગૌરવવાળી પદવી જોઈતી નથી. સીધી-સાદી પદવીની જરૂર છે. મને ‘સજ્જન’ બનાવી દો.”
સમ્રાટે કહ્યું,” ભાઈ, હું તને ‘લૉર્ડ’ કે ‘ડ્યૂક’ બનાવી શકું, પણ તને સજ્જન બનાવવાનું કામ મારી શક્તિ બહારનું છે. “