મોટો મૂર્ખ કોણ

એક ગામ હતું ગામના પાદરે બે ભાઈઓ ચાલ્યા જતા હતા ત્યાં સામે તેમને એક બીજો વટેમાર્ગુ મળ્યો આ જોઈ તે વટેમાર્ગુઅે બંને ભાઇઓને રામ રામ કહ્યા અને પોતાના માર્ગે આગળ ચાલ્યો.

હવે બંને ભાઈઓ વિચારમાં પડી ગયા કે આ વટેમાર્ગુઅેુ રામરામ કહ્યું કોને??

એક ભાઈ કહે કે ‘રામ રામ’ મને કહ્યુ ,જ્યારે બીજો ભાઈ કહે કે ‘રામ રામ’ મને કહ્યું . આમ, બન્ને ભાઈઓ વાદ વિવાદ કરવા લાગ્યા.

પછી બંનેએ વિચાર કર્યો કે આપણે પહેલા વટેમાર્ગુ ને જ પૂછી જોઈએ કે તેણે ‘રામરામ’ કોને કહ્યું? આથી તેઓ બન્ને તે વટેમાર્ગુ પાસે ગયા.

એક ભાઈએ પૂછ્યું, હે વટેમાર્ગુ ! તમે ‘રામરામ’ કોને કહ્યું? મને કહ્યું કે આ ભાઈને??

વટેમાર્ગુ વિચારમાં પડી ગયો અને વિચાર્યું કે આ બંને મુર્ખાઓ લાગે છે, એટલે એણે કહ્યું કે તમારા બંનેમાંથી જે પણ મૂર્ખ હશે એને હું રામરામ કહીશ. બંને ભાઈઓ એક સાથે બોલી ઉઠ્યા કે હું મૂર્ખ, હું મૂર્ખ …

વટેમાર્ગુ કહે કે બંને પોતપોતાની વાત માંડીને કહો કે તમે મુરખા કઈ રીતે છો એક ભાઈએ પોતાની વાત શરૂ કરી. એક વખત અમે ખેતરમાં તલનિ ખેતી કરેલી હતી. તલની લણણી બાદ તેને ભરવા માટે અમે કોથળા સિવતા હતા એ દરમિયાન સિવવાની સોય તલના ઢગલામાં ક્યાંક પડી ગઈ. અમે સોયને ખૂબ શોધી પણ મળી નહીં આથી અમે સોયને શોધવા માટે તલના પાકને સળગાવી નાંખ્યો છતાં પણ સોય ન મળી તે ન જ મળી. બોલો, હું મૂર્ખ ખરો કે નહીં? વટેમાર્ગુ કહે કે હા ભાઈ તું તો મોટો મૂર્ખ કહેવાય માટે તને રામ રામ..

હવે બીજા ભાઈએ પોતાની વાત શરૂ કરી બીજો ભાઈ કહે કે એક વખત મેં ગરમીમાં મુંડન કરાવવા વાળંદને ઘરે બોલાવ્યો મુંડન થઈ ગયા બાદ ને વાળંદને રૂપિયા આપ્યા પરંતુ તેની પાસે છૂટ્ટા ન હોવાથી તેણે મને બાકીના રૂપિયા પછી આપવા કહ્યું, પરંતુ હું માન્યો નહી. મેં મારી પત્ની અને દીકરાનું મુંડન પણ કરાવી લીધું. આ બનાવ પછી હું કામ તે જતો રહ્યો. પાછળથી બૈરી અને છોકરો ઘરની બહાર ન નીકળે. બેરીએ મોટો ઘૂમટો તાણી રાખ્યો. આથી આડોશી પાડોશીને થયું કે નક્કી કંઈક થયું છે આથી પાડોશીએ બૈરિના તથા મારા ઘરના સભ્યોને બાજુના ગામમાં જાણ કરી કે ભાઈ મૃત્યુ પામ્યા છે બૈરી અને દીકરાએ મુંડન કરાવ્યું છે તમે લોકો જલ્દી આવો.

હવે સગાવહાલા બધા જ ગામમાં રોતા કકળતા ઘરે આવ્યા. આ બધી રોકકળ થતી હતી ત્યાં હું ગામતરે થી પાછો આવી ગયો .મને જોઇને બધા ડરી ગયા કે ભાગો ભૂત આવ્યું છે.

ત્યારબાદ મેં બધાને શાંત પાડ્યા અને કહ્યું કે વાળંદ પાસે છુટ્ટા રૂપિયા ન હોવાથી બૈરી અને દીકરાનું પણ મુંડન કરાવ્યું છે હવે બોલો, હું મૂર્ખ કે નહીં ??
વટેમાર્ગુ અે બીજા ભાઇને પણ કહ્યું કે,”હા ભાઈ તું પણ મોટો મૂર્ખ, તને પણ રામ-રામ.તમને બંનેને રામરામ. આવજો. અને બધા પોત પોતાના રસ્તે આગળ ચાલ્યા.

• મુનિરાબેન કચ્છી….✍️